Meraai vannie baai

~ Volmaak afgerond ~

as daar vir ons
'n aardse uitveër was,
sou ons instaat wees
om soos 'n kunstenaar,
die donkerste dele uit
te wis in ons lewensskets:
kraakwit sou dit uitstaan

~ Volmaak afgerond ~

Gaweline

Prelude vir eendag

Jy laat los note in my hart
saamvloei tot ‘n melodie;
legato, vloeiend,
rustig, wagtend.

Skugter los gedagtes
crescendo tot klimaks
van erkenning,
verligting.
Borrelvreugde
staccato deur my are.

Lighoofdig dans ek
op maat van jou musiek.
Vergeet van tyd en plek.
Heupswaai lokkend
tango ons dan saam.

Wanneer laaste note
rallentando in my kop
en stadig wegvloei
tot ons uitgeput bly staan,
klap ons hande vir die orkes
en stap terug na die lewe.

Dit was maar net –

‘n prelude vir eendag

~~~~~~~~~

Miskien

miskien moet ek ophou
om om te dink,
net aangaan my
dagbestaan

miskien moet ek
glad nie veg daarteen
net oorgee aan die
roepstem van my hart

miskien verbeel ek my
en is dit glad nie
wat my kop
vir my sê

dalk is ek verby
die fase van miskien
en is ek lankal by
miskien tog wel

of...

dalk was dit nog
die hele tyd
bloot maar net
miskien...