'n Sagverligte onthou van kindwees
skuil primitief toegevou, in die vlees
Antiek! Antiek! Verklap 'n plooi;
en die kant van my laslap kooi!
Nostalgies die prooi - word ek so omring
Antiek gewis, niks nuuts kan dit verdring!

Elke draai en kronkel . . . op hierdie pad
van ons gister's, laat vonkel weer 'n skat:
Onthou! Onthou! En ekke staar
na die oomblikkies; so vergaar
Die geur van pypkaneel laat my nou weer
onthou ... warm pannekoek in koue weer!
© Meraai vannie baai

Die Engelse weergawe van hierdie gedigstruktuur is geskep deur Jan Turner,
en vereis 2 of meer verse van ses reëls elk.

Die rymskema is a,a,b,b,c,c en die interne rym in reël 2 wat rym met 'n woord in reël 1 van elke vers
bied 'n groot uitdaging saam met die lettergreep vereiste van 10, 10, 8, 8, 10, 10.

In die derde reël word daar ook 'n uitroep/uitdrukking/bevel ens.
met 'n herhaalde 2 lettergreepwoord of 2 woorde geplaas.

Hierdie woord word dan ook in reël 6 as 1ste woord, weer een keer herhaal.

Met my voorbeeld in Afrikaans het ek ook probeer om die vereiste lettergrepe
so te kies, dat die gedig gekonstruktueerd voorkom. Ek het ook in ander reëls
gebruik gemaak van interne rym.

Hierdie kreatiewe skryfvorm bied weer 'n wonderlike uitdaging aan die skrywers
Daar is nie ander Afrikaanse voorbeelde of riglyne vir ons waarop ek afgekom het
vir hierdie skryfvorm nie.

So ons skeppinge is 'geskoei' op die strukture wat ons daardie tikkie uniekheid/andersheid gee
vir digtersvryheid binne 'n raamwerk!

*Volg hierdie skakel en by invented poetry types, druk op staccato. Daar is 'n pragtige uiteensetting van die riglyne in Engels
http://www.shadowpoetry.com/resources/wip/types.html

HIER IS TRAPPIES SE TWEE PRAGTIGE WEERGAWES GESKOEI OP DIE STACCATO STRUKTUUR:

Trapsoetjie
Oi wee Ta-Meraai noem dit 'n uitdaging. Ek kan aan 'n paar ander woorde dink om dit te beskryf en uitdaging is nie een van hulle nie eish met eish ja....

Stukkie Hout!

Tongeklap, woorde wap, mense trap rond
Spatsel van geraamtes, breek deur die grond
Vabond! Vabond! Jou stommerik
tref jy die aarde met ‘n hik
In ‘n tweestryd sal ons altyd bly staan
Vabond, bring vir die mense musiek aan.

Handeklap, voetestamp, ons word gesond
Speel vir ons nog musiek, kleine vabond
Lekker, Lekker wikkel my lyf
So word ek deur klanke gedryf
Gooi vir Andries, Rooies en Hugo saam
Lekker toonkuns spring uit die Houtstok raam!
©

My cul de sac

Warm gloede braak deur woorde nie gespreek.
Gedagtes bring wraak, stil woorde weerspreek,
Genade! Genade! onthou.
So moet ons in ander vertrou.
Groot skokke deur ons liggaam oor lewe.
Genade is waarna ons nou strewe.

Goue draadjie hang aan ‘n donker wolk.
Jy maak ons bang, met jou hand om ‘n dolk,
Gryp nou! Gryp nou! Dis belangrik.
Vang vas die lig, laat donker skrik.
Cul de sac is iets waarmee jy nou speel.
Gryp nou! Voordat jakkals jou lewe steel.
©

Naas
My Taal

Ek sal verdrink in die trots van my taal,
maar as ek dink hoe die vloek dit vervaal.
Verdomp! Verdomp! Kan jy nou meer?
Die vloek maak my ore net seer.
Ek wil hard en luid te hemele skree.
Verdomp of ek my taal vir verderf gee.

Dan kom die kunstenaar en liedjieboer
en onthaar my taal met ingelse sloer.
Hou op! Hou op! Jou tweegat drek.
Praat my taal of hou toe jou bek.
Engels loop soos vrotpap uit jou mond uit.
Hou op met mengeltaal en praat prontuit.

© Naas